Remata a conta atrás para o regreso da Copa Galicia Enduro

O certame autonómico que máis medrara nos anos anteriores á pandemia regresa neste 2022. A Copa Galicia Enduro volve aos montes da nosa comunidade, logo de dúas campañas de paréntese, cun calendario composto por cinco eventos. As primeiras camisolas de líderes poranse en xogo este domingo no VigoBikeContest. 

A temporada da Copa divídese en dous bloques, un de primavera e outro de outono. Tras a proba de apertura preparada polo Singletrack Outdoor Sports para esta fin de semana, en menos dun mes celebraranse outras dúas citas. O domingo 27 de marzo disputarase o Enduro das Rosquillas. Picaraña BizieBike en Ponteareas e dúas semanas máis tarde, o domingo 10 de abril, pecharase a primeira parte do calendario no Porriño co Enduro BTT Faro de Budiño da A.D. A Forna. 

A resolución deste certame queda para outubro. O domingo día 2 o BTT Castrobikes exercerá de anfitrión no Enduro Monte Xiabre. Da penúltima xornada en Vilagarcía de Arousa a Copa retornará ao seu punto de partida para baixar o pano. No Vigo Enduro Vixiador, o evento do Vigoenduro MTB, coroarase o domingo 30 ás gañadoras e aos gañadores das clasificacións finais. 

CALENDARIO

13/3 VigoBikeContest - Singletrack Outdoor Sports C.

27/3 Enduro das Rosquillas. Picaraña BizieBike - Picaraña, A.D.C.

10/4 Enduro BTT Faro de Budiño - A Forna A.D.

2/10 Enduro Monte Xiabre - BTT Castrobikes, C.

30/10 Vigo Enduro Vixiador - Vigoenduro MTB C.