Antonio Ferreiro e Sara Yusto vencen no Endurrazo da Copa de España de Enduro 2024

A localidade pontevedresa de Moaña acolleu a pasada fin de semana o Endurrazo 2024, a segunda cita dunha Copa de España de Enduro que se estenderá ata o 19 de maio, cando se bote o peche ao circuíto estatal coa Montefaro Enduro Race.

Ao redor de 300 participantes citáronse no municipio morracense para disputar unha Copa de España cun tramo nocturno cronometrado o sábado e o resto da acción concentrada na xornada dominical.

Antonio Ferreiro mostrábase como o máis rápido en categoría absoluta, avantaxando en cinco segundos ao segundo clasificado, Marco Veiga, e en sete ao terceiro en discordia, Edgar Carballo. No que respecta ás mulleres, Sara Yusto impoñíase na clasificación absoluta feminina superando en dous segundos a Alba Arias e en 19 a Natalia Menéndez.

Deste xeito, Sara Yusto pasa a comandar a xeral do certame estatal con 355 puntos, con Alba Arias como segunda clasificada con 295 puntos e Natalia Menéndez terceira con tamén 295 puntos. En canto aos homes, Marco Veiga lidera a clasificación xeral da Copa de España con 350 puntos polos 283 de Edgar Carballo e os 232 de Bruno Jiménez.

Resto de gañadores do Endurrazo:

Cadete: Álvaro Le Page

Júnior: Bruno Jiménez

Júnior fem.: Natalia Menéndez

Sub23: David Fernández

Sub23 fem.: Lara Palacio

Máster 30: Santos Lemos

Máster 40: José Manuel López

Máster 50: Marcos Araujo

Máster 50 fem.: Angelica García

Máster 60: Miguel Ángel Taus

A próxima cita da Copa de España de Enduro terá lugar en Puntallana (Santa Cruz de Tenerife) o 20 de abril.

Clasificacións

Fonte: RFEC