Tomás Pombo remata coa seca de podios galegos na Copa de España Júnior de Estrada

Dende agosto do 2017, cando Guillermo García fixo segundo no Trofeo Ayuntamiento de Peñafiel, un corredor galego non pisaba o podio da Copa de España Júnior de Estrada. Esa seca impediu o pasado sábado Tomás Pombo que chegara aos sete anos. O cicista carballés do Padronés-Cortizo obtivo a terceira posición no Circuito Guadiana, a proba inaugural deste certame no 2024. 

Nun percorrido de 120 quilómetros con saída e chegada na localidade pacense de Don Benito, o pupilo de Jesús Rodríguez Carballido xogouse o terceiro posto na recta final co valenciano Héctor Álvarez (Lucta) e co vasco Marco Martín (Baqué Team). Tomás Pombo impuxo a súa punta de velocidade e encabezou un trío que cruzou a liña de meta a 15 segundos do andaluz Juan José López (Valverde Team) e a 48" do valenciano Enrique Maranchón, que lle outorgou o triunfo á formación galega do Picusa Academy na súa estrea na Copa de España. O conxunto porriñés tamén se anotou a vitoria por equipos. 

O podio do corredor de Carballo, de segundo ano na categoría, súmase á vitoria acadada a fin de semana anterior na xeral da Challenge Vuelta Ciclista a Extremadura. A Copa de España Júnior Cofidis consta esta temporada de seis carreiras puntuables e a seguinte chegará o 20 de abril en La Canonja (Tarragona). 

O Circuito Guadiana tamén deu inicio un día despois á Copa de España Elite e Sub-23 con máis alegrías para o Padronés-Cortizo. A escuadra coruñesa venceu por medio do elite checo Vojtech Kminek, apuntouse o terceiro posto e a vitoria sub-23 co balear Francesc Bennassar, a cuarta posición co sub-23 castelanleonés Daniel Cavia e dominou a táboa por equipos. Esta competición continuará o próximo domingo en Alcantarilla (Región de Murcia) co Trofeo Guerrita e as súas dúas últimas xornadas disputaranse o 18 e o 19 de maio en Galicia. 

Taça de Portugal

Outros resultados sobranceiros para o ciclismo galego de estrada rexistráronse durante a fin de semana nas dúas primeiras citas da Taça de Portugal de Esperanças, circuíto aberto a corredores juniors e sub-23. O porriñés Sergio Lorenzo (High Level - Gsport) asinou a cuarta praza absoluta e sub-23 o sábado en Vila Velha de Ródão, onde o Padronés-Cortizo fíxose co triunfo grazas ao balear Marc Torres, e o domingo o pontevedrés Iván Belmonte (High Level - Gsport) clasificouse sexto absoluto e sub-23 en Sertã. Nesta última carreira, o Picusa-Academy volveu subir ao máis alto do caixón con Enrique Maranchón, o mellor júnior. 

Máis información Copa de España